Xingyi Lin Chen artistaren, diseinatzaile grafikoaren eta ikusizko komunikatzailearen proiektu honek memoria kolektiboa ikuspegi emozional eta sakonki gizatiar batetik aztertzen du, eguneroko galdera bat migrazioari, errotzeari eta identitateari buruzko istorioetarako sarbide bihurtuz.

Jan duzu jada? Txinako kulturan errotutako agurra da, diasporan bizirik dirauena: zer moduz? galdetzeko modu bat, maitasuna adierazteko eta hesi emozional, kultural eta linguistikoen gainetik zubiak eraikitzeko. Instalazioa Euskal Herriko diaspora txinatarraren artxibo emozionala da, janariaren, zaintzaren eta afektuen hizkuntza intimoaren bidez eraikia.

Janaria zaintzaren hizkuntza eta transmisio kulturalerako bide gisa hartuta, erakusketak Euskadiko pertsona txinatarren belaunaldi desberdinak lotzen ditu eta askotariko bizipenak jasotzen ditu, familia, komunitate eta afektu-loturak balioan jarriz. Horren harira, “华侨” (huáqiáo) hitzak —“itsasoz haraindiko txinatarra”— itsasoarekiko harreman historikoa eta migrazioan itsasontziaren erabilera adierazten ditu.

Instalazioa diaspora txinatarreko pertsonen ahotsetatik eraikitzen da, belaunaldi eta ibilbide desberdinetakoak, adopzioaren bidez iritsi zirenak barne. Ardatz horretatik sortzen dira gainerako elementuak: dokumental-bideo bat; proiekzio-gainazal bihurtutako plater bat, non oroitzapenak irudi eta mugimendu bilakatzen diren Mina Qiu-rekin sortutako soinu-paisaia audioerreaktibo baten bidez; eta 3Dn digitalizatutako objektu pertsonalak, memoriaren eraldaketari buruzko galderak planteatzen dituztenak. Proiekzio bisual bakarrean, bideo-mappinga eta audioerreaktibitatea uztartuz, elkarrizketa interkulturalerako, memoriarako eta oroitzapenetarako espazioa sortzen da.

Artistaren lehen artelana da, bere familiaren 90eko hamarkadako migrazioarekin lotutako motibazio pertsonal eta intimotik abiatua. La Perrera-n erakutsi da, Bilboko Udaleko Gazteria Sailaren Konekta Ideiak ICC+IA deialdian, Miren Lauzirikaren mentoritzapean (Art For Life). Proiektuak askotan oharkabean igarotzen diren komunitate baten istorioei ahotsa eman nahi die, haren bizipenak eta loturak hurbilduz.