Ricardo Bastida Udal Alondegiaren, Casilda Andrearen Parkearen, Indautxuko Eskolen, Kale Nagusiko Lezama-Leguizamon etxeen, Torre-Urizarreko langile-auzoaren eta Erriberako Eskolen eta Institutu Nagusiaren, eta Bilboko hiribilduko hiri-paisaia osatzen duten beste eraikin askoren egilea da. Bere obra XX. mendeko lehen hogeita hamar urteetako Bilboko arkitekturarik onenaren parte da.
Ricardo Bastida udal-arkitektoa baino askoz gehiago izan zen. Arte Ederrekin maitemindu zen, eta bere lagun artistetako batzuk deitu zituen bere arkitektura-lanak edertzeko.
Esate baterako, Aurelio Arteta edo Genaro Urrutia margolariak, Higinio Basterra, Quintín de Torre edo Federico Sáenz eskultoreak…
Ricardo Bastidak amets bat izan zuen bizitza osoan: Bilbo “Iparraldeko Atenas” bihurtzea. Horregatik, Bilboren sorreraren 700. urteurrenean, Temas Vizcaínos-Bizkaiko Gaiak bildumak haren memoria, humanismoa eta lan ona gurtzen ditu.