Karola Garabia Euskalduna ontziolarako itsasontziak eraikitzeko erabiltzen zen. Zikoina motako garabi bat da, 60 m-ko garaierakoa eta 30 tonako pisukoa. Talleres de Erandio, S.A. enpresan eraiki zuten, 1957an. Espainian fabrikatutako garabien artean indar handikoena zen garai hartan, eta blokeak aurrefabrikatzeko eta harmailan muntatzeko lanak egiteko Bilbon ezarritako lehena.

Jatorriz, eraikuntzako 1. harmailan egon zen, baina, gaur egun, Ponpa Etxetik hurbil kokatuta dago, monumentu bihurturik. Karola Euskalduna itxi arte egon zen jardunean, eta ontzi eraikuntzako funtzioak bete zituztenetatik Bilbon gelditzen den bakarra da.

Baina… ba al zenekien emakume bati zor diola izena? Deustuan bizi zen emakume bat zen Carola, egunero txalupan zeharkatzen zuena itsasadarra, lanera joateko. Elezaharrak dioenez, emakume haren dotoretasunak garabiarena gogorarazten zuen, eta horregatik jarri zioten langileek garabiari haren izena: Karola. Halaber, elezaharrak dio emakume hura paretik igarotzean sekulako iskanbila sortzen zenez eta langileek tarte batez lan egiteari uzten ziotenez, ontziolen zuzendariak autoa eskaini ziola txaluparik hartu behar izan ez zezan, baina emakumeak ez zuen eskaintza onartu, nonbait, eta beti bezalaxe jarraitu zuen lanera joateko itsasadarra zeharkatzen.

Bere historiari buruz gehiago jakin nahi duzu? Bisita gaitzazu!